22 ივლ
ნინა ხატისკაცი აზიისა და წყნარი ოკეანის ქვეყნების რეგიონულ დიალოგს დაესწრო

თბილისის მერის მოადგილე ნინა ხატისკაცი აზიის განვითარების ბანკისა (ADB) და ღია მმართველობის პარტნიორობის (OGP) მხარდაჭერით  ფილიპინების დედაქალაქ მანილაში გამართულ  აზიისა და წყნარი ოკეანის ქვეყნების რეგიონულ დიალოგს დაესწრო.

დიალოგში მონაწილეობდნენ მმართველობის პარტნიორობის საპილოტე პროგრამისთვის შერჩეული  ადგილობრივი ხელისუფლების წარმომადგენლები, მათ შორის თბილისი. საპილოტე პროგრამაში შერჩეული ადგილობრივი თვითმმართველობებმა მიმდინარე წლის ბოლომდე უნდა შეიმუშაონ და 2017 წელს განახორციელონ ვალდებულებები, რომელიც მმართველობაში საზოგადოების ჩართულობის, ადგილობრივი ხელისუფლების ანგარიშვალდებულების, ინფორმაციის ხელმისაწვდომობის  და ღია მმართველობის სხვა სტანდარტების გაზრდისკენ არის მიმართული. აზიისა და წყნარი ოკეანის ქვეყნების რეგიონული დიალოგის მიზანი მონაწილე ქვეყნების მიერ ამ ვალდებულებების შესრულების მხარდაჭერაა. 

რეგიონული დიალოგის ფარგლებში ნინა ხატისკაცმა თბილისის ადგილობრივი ხელისუფლების ღია მმართველობის არსებულ გამოცდილებასა და სამომავლო განვითარების ხედვაზე ისაუბრა.  მერის მოადგილემ  ყურადღება გაამახვილა OGP-ის ფარგლებში თბილისის მიერ ასაღები ვალდებულებების შემუშავების პროცესს და ამ პროცესში საზოგადოების მაქსიმალური ჩართულობის ხელშეწყობის საჭიროებას. ნინა ხატისკაცმა ხაზი გაუსვა ადგილობრივი ხელისუფლების, როგორც საზოგადოებასთან ყველაზე ახლოს მდგომი ხელისუფლების  განსაკუთრებულ როლსა და გამოწვევებს ღია მმართველობის სტანდარტების ამაღლების პროცესში. 

2016 წლის რეგიონული დიალოგის ფარგლებში შეფასდება ღია მმართველობის პარტნიორობის პროგრამაში ჩართული ქვეყნების ცენტრალური ხელისუფლებების (მათ შორის საქართველოს) მიერ 5 წლის მანძილზე  დაგროვილი მიღწევები  და განისაზღვრება სამომავლო სამოქმედო პრიორიტეტები. 

ვრცლად
14 აპრ
თბილისი პროგრამის „ღია მმართველობის პარტნიორობა“ (OGP) შესარჩევი ეტაპის გამარჯვებულია

თბილისი მოხვდა იმ 15 ქალაქსა და რეგიონს შორის, რომელიც  მსოფლიოს 45 მონაწილე კანდიდატიდან შეირჩა. შედეგად, საქართველოს დედაქალაქი ჩაერთვება ადგილობრივ  ხელისუფლებათა საპილოტე პროგრამაში.

„ღია მმართველობის პარტნიორობის“ პროგრამას საფუძველი 2010 წელს პრეზიდენტ ბარაკ ობამას ინიციატივით ჩაეყარა, როდესაც გაეროს გენერალურ ასამბლეაზე აშშ-ს პრეზიდენტმა ქვეყნების ლიდერებს მოუწოდა გამჭვირვალობისა და ანგარიშვალდებულების გაზრდის გზით პასუხისმგებლობა აეღოთ მთავრობების საქმიანობის ღიაობაზე, კორუფციასთან ბრძოლასა და სამოქალაქო ჩართულობის ამაღლებაზე. დღეისათვის „ღია მმართველობის პარტნიორობაში“ 69 ქვეყანა მონაწილეობს ცენტრალური ხელისუფლებების დონეზე, მათ შორის 2011 წლიდან - საქართველოც. ეს ქვეყნები ვალდებულებას იღებენ, ხელი შეუწყონ გამჭვირვალობას, სამოქალაქო უფლებების გაზრდას, კორუფციის წინააღმდეგ ბრძოლას და ახალი ტექნოლოგიების დანერგვას მმართველობის პროცესში.

ადგილობრივ ხელისუფლებათა საპილოტე პროგრამაში მონაწილეობა ნიშნავს, რომ თბილისის მუნიციპალიტეტის მერია სამოქალაქო სექტორთან თანამშრომლობის გზით მმართველობას გახდის კიდევ უფრო მეტად ღიას, გამჭვირვალეს და მოქალაქეთა ჩართულობაზე ორიენტირებულს. თბილისი და შესარჩევი ეტაპის სხვა გამარჯვებული ადგილობრივი ხელისუფლებები (პარიზი (საფრანგეთი), ონტარიო (კანადა), მადრიდი (ესპანეთი), შოტლანდია (გაერთიანებული სამეფო), ელგეიო მარაკეტი (კენია), ჯალისკო (მექსიკა), სეული (სამხრეთ კორეა) და სხვა) კონსულტაციების შედეგად შეიმუშავებენ სამოქმედო გეგმას, რომლის დამტკიცების შემდეგ დაიწყება გეგმის იმპლიმენტაცია. სამოქმედო გეგმისა და აღებული ვალდებულებების შესრულებას  მონიტორინგს გაუწევს OGP „დამოუკიდებელი ანგარიშის მექანიზმის“ (IRM) მეშვეობით.

აღნიშნულ პროგრამაში ჩართვით თბილისი ხდება იმ დიდი ქსელის ნაწილი, რომელიც აერთიანებს სხვა ადგილობრივ ხელისუფლებებს, სამოქალაქო ორგანიზაციებს, სამეცნიერო საზოგადოებასა და სხვა პირებს, რომლებიც  მიზნად ისახავენ შეცვალონ და გააუმჯობესონ მმართველობის კულტურა და „ღია მმართველობის პარტნიორობას“ ამ მიზნის მიღწევის საშუალებად მოიაზრებენ.

 „ჩვენ გავაკეთეთ განაცხადი პროგრამაში ჩართვისათვის, რადგან OGP მოიაზრება ღია მამრთველობის რეფორმებისა და ამ მიმართულებით ინოვაციების განხორციელების მნიშვნელოვან პლატფორმად. ის, რომ თბილისი მოხვდა მსოფლიოს მასშტაბით გამართული კონკურსის 15 ფინალისტს შორის, თავისთავად მეტყველებს ჩვენი ხედვებისა და საქმიანობის OGP-ის მიზნებთან თანხვედრაზე, თუმცა კიდევ დიდი ძალისხმევაა გასაწევი ამ მიმართულებით. უახლოეს თვეებში სამოქალაქო სექტორის წარმომადგენლებთან ერთად ჩვენ აქტიურად ვიმუშავებთ სამოქმედო გეგმის შედგენასა და მის შესრულებაზე. ამ პროცესში ყველა ის უწყება და ორგანიზაცია იქნება ჩართული, რომლებმაც მნიშვნელოვანი წვლილი შეიტანეს საქართველოში OGP-ის პრინციპების დამკვიდრების მიმართულებით“, განაცხადა თბილისის მერმა, დავით ნარმანიამ.

„მოხარული ვარ, რომ ასეთი მაღალია დაინტერესება ადგილობრივ ხელისუფლებებთან მოქალაქეთა ურთიერთობების პროცესის გაუმჯობესებით... მეამაყება, რომ სწორედ ჩვენი ორგანიზაციაა მსოფლიოს მრავალი საინტერესო და ინოვატორული რეფორმის მხარდამჭერი და ინიციატორი“ -  „ღია მმართველობის პარტნიორობის“ აღმასრულებელი დირექტორი, სანჯეი პრადჰანი.

ვრცლად